كلمة السر ...قصة جميلة جداااا

لما كنت طفلة صغيرة كان يوم عيد ميلادي بالنسبة لي هو احلي يوم في السنة!!...


حفلة كبيرة وهدايا!...


كبرت شوية... ودخلت المدرسة...وتخيلت ان احلي يوم في حياتي...هايكون يوم ما اتفوق في دراستي... ويختاروني الطالبة المسالية!...


وفعلا حصل!... وفرحت جدا طبعا!... لكن ! ... بعد شوية حسيت ان مش هو ده اللي انا بادور عليه! ...


انتهت دراستي ...


وقلت لنفسي" يمكناحلي يوم في حياتي ... هايكون يوم ما اشتغل واكون شخص مستقل ! ... ولا حد يقوللي هاحرمك من المصروف !...ولا حد يقوللي رايحة فين ومافيش خروج بعد الساعة كذا!..."


وفعلا حصل ! ...واشتغلت ! ...


لكن في الشغل شفت العجب ! ... ويا بخت من كان المدير خاله ! ...


كله بيقول:" ياللا مصلحتي! "


وشفت ناس ماعندهاش مانع علشان تطلع درجة ... تطلعها علي جثة اللي حواليها !...


بعدها قلت لنفسي : " الحياة من غير الحب .. عاملة زي الصحرا ..غالبا احلي يوم في حياتي هايكون يوم ما اتجوز الشخص اللي باحبة ! ...اكيد وقتها هامسك نجوم السما بايديا ! .. "


وفعلا حصل .. حبيت واتجوزت !..


لكن ياخسارة يا حب ! ... ماكانش العشم ... مالاقيتش فيك اللي كنت بادور عليه !...


قلت لنفسي : "العيال ... اكيد احلي يوم في حياتي .. يوم ما ربنا يرزقني بطفل ! .. اكيد هو اللي ها يعوضني عن اي خسارة !.. "


وفعلا حصل ! .. رزقني ربنا بولد يفرح !.. مفرحش ازاي !!.. ده هو الغالي .. اللي قلبي شافه قبل عيني ! ..


لكن ! .. تعبت وربيت وكبرت! .. وفي الاخر .. معلش يا ماما اصل ظروف الحياه شاغلاني ومبعداني عنك !...


قعدت مع نفسي .. واسترجعت كل الاحداث اللي مريت بيها في حياتي .. واستغربت جدا !..لان مافيهاش حاجة انا اتمنيتها .. وماحصلتش عليها !.. ومع كده .. لا مال ولا جمال شبعني ! .. ولا حسب ولا نسب رواني ! ...


في قرار نفسي حاسه اني حزينة ومش مرتاحة ! ..


شوية ظروف .. حلوة بترفعني فوق فوق ! ..


وشوية ظروف صعبة .. بتنزلني تحت تحت !..


انا فعلا تعبانه! ..


فجأة !..سمعت صوت في همس في ودني بيقول : " تكثر اوجاعهم الذين اسرعوا وراء اخر" مز 16 : 4


"لأن شعبي عمل شرين : تركوني انا ينبوع المياه الحية , لينقروا لأنفسهم أبارا , أبارا مشققة لا تضبط ماء " ار 2 : 13


خفت ! .. " لأن كل كلامه كان بسلطان " لوقا 4 :32


وقلت له : انت مين ؟!؟؟؟ ...فقال لي " انا يسوع اللي انتي ( بتستهيني بوجوده في حياتك!) اع 9 :5


سألته بمنتهي السذاجة : هو انت يسوع بتاع يوم الحد الصبح ؟! .. يسوع اللي في الكنيسة ؟! ...


صعبت عليه ... وبحنان ماشفتوش قبل كده قاللي : وهو في حاجة تعباكي وممررة حياتك غير ان انتي فاكرة ان انايسوع بتاع يوم الحد الصبح بس ! ...


لا يا حبيبتي .. انا يسوع بتاع الاتنين والتلات والاكل يوم ! .ز انا يسوع بتاع العمر كله ! ..


ارتحت له ! .. وقررت افضفض له ع اللي في قلبي ! ..


قلت له انا تعبانه ! ..


كل ما اتمني حاجة .ز بافضل وراها لغاية ما احصل عليها .. ولما باطولها .. باشعر اني مسكت الهوي بايدايا! ..


" الكل باطل وقبض الريح "جا 1 :14


" كل الانهار تجري الي البحر والبحر ليس بملأن"جا1 : 7


علشان كدة ماتستغربيش انك جعانة و عطشانة ! ..


انتي سيبتيني و جريتي ورا أبار ناشفة !..


كنتي متخيلة انها هاترويكي وتسعدك ! ..


"فأعلمي ان تركك الرب الهك شر ومر" ار 2 :19


يوم ما ابتديتي تشتغلي .. ما أخدتنيش معاكي وانتي رايحة الشغل !..


يوم ما فكرتي ترتبطي .. ما خدتيش رأي وانتي بتختاري شريك حياتك !..


يوم ما رزقتك .. بطفل ما سألتنيش تربي ابنك ازاي !..


مشكلتك كانت دايما انك فاكرة ان انا يسوع اللي في الكنيسة وبس!..


قدام ايده المدودة .. بمحبة مالهاش اول من اخر ! ..ما قدرتش اقول له ( لأ ! ) ..ولا (طيب بعدين ).. ولا (هابقي أفكر )...


لكني لقيت نفسي باقوله :


"فقالت مريم : هوذا انا امة الرب ليكن لي كقولك " لو 1 :38


يومها فعلا كان يوم عيدي ! ..اخيرا لقيتك يا احلي يوم في حياتي !..وهاتفضل احلي يوم لغايت مايجي اللي احلي منك .. يوم ما هاشوف حبيبي يسوع بعيني ! ..


لما الناس بيسألوني ايه السر ورا التغير ده كله في تصرفاتك !؟؟؟ ...


باقول لهم :كلمة السر هيه ( يسوع اتولد ) ! ..


بيقلولي : وايه الجديد في كده!؟؟؟.. انتي جبتي ايه من عندك ؟؟؟ .. ما كلنا عارفين ان (يسوع اتولد) !..


باقول : فعلا .. لو كان الامر انتهي عند يسوع اتولد وبس ..كنت هافضل انا زي ما أنا !.. لكن كلمة السر هي : (يسوع اتولد جوايا !..)


وقفت قدام عيني المقفولة !..


وقلت لها اتفتحي يا عيني !..


قالت لي : ايه هي كلمة السر ؟..


قلت لها : (يسوع اتولد جوايا !..)


فانفتحت في الحال ..


وقالت لي :ياااااااه !.. اخيرا هاتبتدي تشوفي ايده اللي ورا أي و كل نجاح في حياتك !..


وان مش مخك اللي يوزن بلد هوه اللي كان بيجيب الديب من ديل! ..


ووقفت قدام وداني المسدودة !..


وقلت لها انفتحي يا وداني !..


قالت لي ايه هي كلمة السر؟..


قلت لها : (يسوع اتولد جوايا !..)


فانفتحت في الحال!..


وقالت لي : ياااااااه !.ز اخيرا هاتبتدي تسمعي صوته وهو متعلق علي الصليب .. وبيقولك (بــــحـــــبـــــك)!..


ووقفت قدام ذهني الاعمي !..


وقلت له انفتح يا ذهني!..


قاللي ايه هي كلمة السر ؟..


قلت له : " يسوع إتولد جوايا ! " ..


فانفتح في الحال ! ..


و قال لي : ياه !.. أخيرا هتبتدي تفهمي الكتاب المقدس و أنتي بتقريه ! .. و تقدري تعيشي آياته .. بعد ما كنتي مجرد بتردديها زى البغبغان ! .. ومتخيلة ان تنفيذها مستحيل!..


ووقفت قدام شهيتي المفقودة للقعدة معاه !..


وقلت لها : إنفتحي يا شهيتي !..


قالت لي :إيه كلمة السر ؟ ..


قلت لها : " يسوع إتولد جوايا ! " ..


فانفتحت في الحال !..


و قالت لى :ياه !.. اخيرا هتبتدي تفهمي إن الحياة من غيره .. لا ليها طعم ولا لون !..


ووقفت قدام قلبي المتحجر ! ..


وقلت له :إنفتح يا قلبي !..


قاللي : إيه هي كلمة السر ؟..


قلت له : (يسوع اتولد جوايا !..)


فافتح في الحال!..


وقاللي : ياااااااااه !.. اخيرا ها تبتدي تشعري بحنيته ! ..


وتحسي ببتعزياته وطبطبته عليكي وانتي بتتالمي !..


بس قلبي بالذات لما انفتح قداي .. شفت فيه اللي ما يسرش عدو ولا حبيب !.. فقلت ل(قلبي) :يادي المصيبة!.. هاعمل فيك ايه ؟! ده انت ها توديني جهنم حدف !!!...


رد قلبي علي وقاللي : (ان كان عليكي انتي .. فانتي ماقدرتيش تعملي حاجة في !.. لكن لطمني خالص لأن رب المجد عمل كل حاجة! ..


"اعطيكم قلبا جديدا , واجعل روحا جديدا في داخلكم ,وانزع قلب الحجر من لحمكم واعطيكم قلب لحم" حز 36 :16 ... وهاتبقي من طينة غير الطينة !.. "الكل قد صار جديدا" 2كورنثوس 5 :17


ميلاد يسوع في العالم قسم تاريخ البشرية الي قبل و بعد الميلاد !..


وميلاده في قلبي .. قسم حياتي الي قبل وبعد الايمان الحقيقي !..


قسمها لــ : زمان كنت .. ودلوقتي بقيت ...


ابسط تغيير كان في لهجة كلامي : زمان .. كنت باقول لربنا :


(انت يارب مش محتاج تعمل مجهود علشان تحبني .. انا أتحب من غير حاجة!..)


لكن دلوقتي .. باقول له : (يا خبر يا رب !.. ده انت نفسك حلو اويانك قادر تبص في وش واحد زيـي !) ..


"صادقة هي الكلمة ومستحقة كل قبول ان المسيح جاء الي العالم ليخلص الخطاة الذين أولهم انا "تيموثاوس الاولي 1 :15


زمان.. لما كنت اسمع وعظ بيتكلم عن اللص المصلوب جنب يسوع .. اللص اللي قال ليسوع : " اذكرني يارب متي جئت في ملكوتك فقال له يسوع :الحق اقول لك انك اليوم تكون معي في الفردوس " لو 23 :42-43


كنت اقول في سري : " ابن الايه عرف يلعبها صح .. عاش حياته بالطول وبالعرض وخطف الملكوت في اخر لحظة " !..


لكن دلوقتي .. لما بتيجي سيرته .. باقول له في سري : غباوتك كانت هاتموتني ناقصة عمر !..


بقي تكون قدامك فرصة تعيش 3 سنين مع يسوع (سنين خدمته علي الارض ) .. وتسيبها تروح من ايدك؟!؟! ..ما كان( رب المجد ) قدامك !.. كنت تقدر تزوح وتيجي معاه !..


كنت تقدر تقعد عند رجليه .. وتسمع كلامه الحلو !..كنت تقدر تشوف جماله ..وتتعلم منه!..


انا متاكده ان ناس كتير قالولك :


(ده يسوع في المكان الفلاني .. تعال معانا !)..


لكن انت اتحججت بحجج فارغة!..


لصل انا عندي صفقة .. لو تمت .. هاتغني!..


اصل انا عندي خروجة مع اصحابي .. انما ايه !..ماتتفوتش!..


انا متاكدة ان كذا شخص قالك :


"الحق نفسك قبل ما تسمع صوت ربنا وهو بيقولك : (ياغبي ! هذه اللية تطلب نفسك منك , فهذه التي اعددتها لمن تكون؟)" لو 12 :20


صحيح انت رحت في اخر لحظة .. وهو قبلك .. لكن يا خسارة !..


رحت له بعد ما اتكسرت عظامك !..


رحت له بعد ما ابليس اكلك .. لحم وعضم !..


رحت لــ (رب الحياة)..لكن بعد ما انتهت الحياة!..


زمان ..كنت كل فين وفين لما اقول : (اشكرك يا رب) !..


لأني ما كنتش ان في شيء غير عادي اشكر ربنا عليه !..


العينين ؟.. طب ما كل الناس بتشوف !..


يعني هو النظر جه لحد عندي وبقي عجبة !..


قيس علي كده كل حاجة!..


لا ده بالعكس كمان !..


لوقدامي كباية مية .. جزء منها مليان و الجزء التاني فاضي .. كنت دايما باركز عيني علي الجزء الفاضي ..وادخل في دوامة " الرثاء للنفس" !..واشمعني انا اللي ماعنديش الشيء الفلاني !..


لكن دلوقتي .. اتعلمت اثبت عيني علي الجزء المليان واشكر ربنا عليه!..


اتعلمت ان اللي عايز يلاقي حاجة يشكر ربنا عليها ..هايلاقي ! .. هايلاقي كتير أو!..


"باركي يا نفسي الرب ولا تنسي كل حسناته" مز 103 :2 ...


... انا فاكرة في مرة اصابتني نزلة برد شديدة جدا !..


نزلة برد ما يعلم بيها الا ربنا ! .. لا كنت قادرة اتنفس من انفي و لا كنت قادرة اتنفس من فمي! .. وقتها اكتشفت ان شوية الهوا ء اللي داخل وطالع من انفي مش حاجة مضمونة او امر عادي مفروغ منه !.. ولكنه نعمة من ربنا !.. ما شعرتش بقيمتها الا لما اتحرمت منها !...


نزلة البرد المحترمة دي .. علمتني درس ماكنش ممكن ابدا اتعلمه وانا في صحة جيدة!..


ولو كان اي شخص حاول انه يقوللي : "اشكري ربنا لانك قادرة تبلعي شوية مية!"..


مش جايز ! .ز لأ ده انا اكيد كنت هاقول عليه انه مجنون !..


"قد تعلمت ان اكون مكتفيا بما انا فيه " فيلبي 4 :11


زمان.. كان ربنا في حـزني مـدعــي !.. وفي فرحـي مــنـــسي!...


لكن دلوقتي .. ما بعرفش افرح بجد .. افرح من قلبي .. الا وأنا معاه .. باكون مش محتاجة اشحت حاجة من حد !..


مش محتاجة اشحت ابتسامة من نكتة علشان احاول اقلل من الكأبة اللي كنت عايشة فيها !..


لأني فهمت ليه سليمان الحكيم قال عن المرأة الفاضلة ..إنها :"تضحك علي الزمان الاتي " أمثال 31 :25...


هي مش بتضحك علشان ليها جارة بتقرا لها الفنجان !... وبتقول لها : ( قدامك سكة سفر !) ..


هي بتضحك علشان بكرة بتاعها في ايد إلــه .. لما طلبته .."أراحها من كل جهة " أخبار الأيام الثاني 14 : 7...


مش محتاجة اشحت كلنة مدح من اللي يسوي واللي مايسواش .. عشان ارضي بيها غروري واشعر ان انا لي قيمة !.. لأ .. خلاص خلصت !.. هاستني رأي مين تاني ؟!.. سـيـد الكل بنفسه قاللي :"صرت عزيزا في عيني ومكرما , وانا قد قد أحببتك" إش 43 :4...


مش محتاجة اشحت شوية نوم من قرص مهدئ او دواء منوم .. لأن حبيبي " بيعطي حبيبه نوما " مز 127 :2...


بسلامة اضطجع بل ايضا انام أنك انت يا رب منفردا في طمأنينة تسكنني " مز 4 :8 ...


مش محتاجة اشحت حب من حد !.. عارف ليه ؟..


أصل اجمل شيء ان حبه يكفي الكل ! .ز ومهما حصل .زحبه ثابت !.. عمر حبه لي ما هايتغير !..


لأنهو نفسة "ليس عنده تغيير ولا ظل دوران" يعقوب 1 :17 ...


لكن الناس .. ايدك منهم والارض !.. كل يوم بحال !.ز وكل ساعة بكلمة !,,


ولما بيحاول ابليس يشككني في محبة الهي لي .. مابحاولش أعيد وأزيد معاه !..


لكن باخده لأقرب صليب حوالي .. وباقول له : ( عارف ايه الدليل علي ان حبه لي عمره ما هايتغير ؟..


الدليل علي كده :


المسمارين اللي في ايده !..


المسمارين دول .. هو رضي انهم يتدقوا في ايديه !..


"لا عن إضطرار بل بلإختيار " بطرس الأولي 5 :2 ..


المسمارين دول .. كانوا بسببي انا !.. وعشاني انا !.. وبدالي انا !..


المسمارين دول بيضمنولي انه هايفضل فارد ذراعيه ! وهايفضل يحبني " الي المنتهي " يوحنا 3 1:1


ابويا السماوي عنده كتير .. كتير أوي أوي !..


مش عنده فلوس (مع انها منه برضه) ..


لكن ده عنده اللي ماتقدرش تشتريه بالفلوس !..


"يعطي الرب لحبيبه سؤل قلبه" مز 37 :4 ..


"يعطيه معزي اخر ( الروح القدس )ليمكث معه الي الأبد" يوحنا 14 :16


مش محتاجة اشحت لحظات طمأنينة علشان أتغلب علي ( مرض العصر) .. الخوف !..


لأن رب الجنود قاللي : "لا تخف لأني فديتك . إذا إجتزت في المياه فأنا معك إذا مشيت في النار اللهب لا يحرقك لأني أنا الرب الهك , مخلصك " إشعياء 43 :1-3 ..


قاللي ماتخافش في دخولك .. وفي خروجك من الخطر


هاسترك من الريح وإيدي .. تكون مظلــــة في الخطر


في يوم من الايام .. كنت قاعدة خايفة من كل حاجة!.. خايفة لحسن ربنا يجربني تجربة صعبة .. اكون مش قدها !.ز وخايفة من الظروف !.. وكل ما اسمع عن مصيبة حصلت لحد .. قلبي يقع في رجلي !...


بصيت يمين .. لقيت مارجرجس داق العذاب الوان !..


بصيت شمال .. لقيت القديسة رفقة دبحوا ولادها قدامها وبعدين موتوها !..


بصيت في الكتاب المقدس .. لقيت يوحنا المعمدان طيروا رقبته علشان تمسك بالحق !..


بصيت في الجورنال .. لقيت طيارة وقعت في المحيط !..


جايز كان فيها واحد علي الاقل بتاع ربنا !..


ومع كده .. الله ماتدخلش لأنقاذه !..


طب فين الحماية؟!؟!؟ ...


فجأة !..سمعت صوت ربنا بيقوللي : القطة ! .. قلت له مالها القطة يارب ؟!...


قاللي : إيه رأيك فيها ؟.. كائن ضعيف قوي ولا قوي ؟..


قلت له :دي كائن ضعيف أوي يارب !...


قاللي طب واللي بيحاول ييجي ناحية ولادها ..بتعمل فيه إيه؟...


قلت له بإستغراب جامد من الموضوع اللي بيكلمني فيه : بتعمل فيه إيه ؟! .. دي بتاكله أكل !...


وانتظرت ان ربنا يسترسل في الكلام .. لكنه سكت !..


وقتها بس وصلتني الرسالة اللي كان عايز يقولهالي !..


وحسيت إني عايزة الأرض تنشق وتبلعني !.. لأني إكتشفت قد إيه أنا باكسر قلبه لما باشك في حمايته لي !.. ولما باشك في أمانته !...


ولاد ربنا مش متسابين ملطشة للظروف .. تعمل فيهم اللي علي مزاجها .. لأ .. هي مش سايبة !.. ولا هو مولد وصاحبه غايب !.. ده صاحبه موجود ومتحكم في أتفه الأمور !...


أوعي تخلي ظروف الناس اللي حواليك تخوفك من ربنا !.. ولا تشكك في محبته و صلاحه !..


مالك إنت ومال إمتحان اللي جنبك ؟!..


خليك في إمتحانك إنت !..


ماتقارنش إمتحان شخص بإمتحان شخص تاني .. لأن كل واحد مختلف عن التاني في حجمه و قوة إحتماله ... المهندس اللي بيصمم كوبري .. بيحدد أقصي حمولة يقدر يستحملها الكوبري .. وبيعلق يافطة لتحذير الناس : (أقصي حمولة : كذا ) !..


ولو الحمولة تجاوزت الحد ده الكوبري هايتحطم !..


فمن باب أولي .. المهندس البارع اللي مصممك إنت !..عارف ومحدد أقصي حمولة تقدر تتحملها !..


ومش بيسمح لحد ولا لحاجة فوق طاقتك إنها تحطمك ..لأنك صنعة إيده ..وغالي جدا عليه !..


" تأديبا أدبني الرب وإلي الموت لم يسلمني" مز 118 :18


الحياة مع ربنا ممتعة ورائعة !..!..


مش لأن مافيهاش عواصف !.. أبدا !.. إوعي تصدق اللي بيقول لك : ( تعال لربنا وحياتك هاتخلو من العواصف والضيقات )!..


ده الكتاب نفسه قال : "كثيرة هي بلايا الصديق ومن جميعها ينجيه الرب " مز 34 :19


لكن إوعي تخلي ابليس يحرمك من انك تدوق حلاوة الهدوء والسلام في وقت العاصفة !..إوعي تخليه يخبيلك بقية الأية اللي بيقول " ... ومن جميعها ينجيه الرب " ..


من جـمـيـعـها .. مش من شوية منها !..


مهما كانت صعوبة مشكلتك .. بدل ما تقول : (يارؤب .. انا عندي مشكلة كبيرة !) ..


قول : (يا مشكلة !.. أنا عندي رب كبير !.. قدير !) ..


"يستطيع كل شيء ولا يعسر عليه أمر " ايوب 42 :2 ..


أصعب المشاكل قدام قدرته .. مالهاش قيمة خالص ! وأصغر الأمور في حياتك .. قدام محبته .. ليها قيمة كبيرة جدا !..


المهم انك تصدق وتؤمن إن ربنا يقدر ..لأن "بدون ايمان لا يمكن إرضاؤه " عبرانيين 11 :6 ...


زمان .. كنت زي الغالبية العظمي من الناس باسمع اغاني .. وحافظة كتير منها !.. لكن كان في جملة بالذات .. كنت كل ما أسمعها أسأل نفسي يا تري مين يستاهل اني أقول له :


اللي عيشـــــته .. قبل ما تشــوفــك عينــي ..


عمـــر ضـايع .. يحــســبوه إزاي عــلي!..


لكن دلوقتي أنا عارفة كويس جدا .. مين الشخص الوحيد اللي يستاهل إني أقول له كده !..مين اللي مقابلته .ز هيه الحياة !..


مين اللي حبه لي .. حب حقيقي !..


لما الشاب بيحب شابة .. بيقول لها : (بحبك موت ! )..


وهي كمان بتقوله : (بحبك موت )..


لكن لو سألته : ( هاتشبكني بإيه ؟ .. قيراط ولا قيراطين ألماظ ؟ ) ..


تبص تلاقيه جاله مغص وهبوط حاد في الدورة الدموية !.. ويقولها : (مماعييش !..) ..


تقوم ترد عليه وتقول له : (نبقي ما تلزمنيش !) ..


أصل هو ده الحب اللي بين البشر ! هاديلك إيه وهاخد منك إيه قصاد اللي هاديهولك !..


يعني بيعة وشروة !.. لكن حب يسوع هو أعظم ثروة !..


ليه؟ .. أقولك ليه ...


لأن يسوع ماقليش " ياليتني مت عوضا عنك يا أبني " صمؤيل الثاني 18 : 33 ...


لأ!.. ماقاليش كلام !.. أصل الكلام سهل !.. مافيش أسهل منه !..ومافيش عليه ضرايب !..


يسوع لما قاللي : (بحبك) !..


ماقالهاليشوإحنا قاعدين في جو رومانسي !.. علي أنغام الموسيقي !..


لأ !ّ..


ده "قدم , بصراخ شديد ودموع ,طلبات وتضرعات للقادر أن يخلصه الموت , وسمع له من أجل تقواه. وصار لجميع الذين يطيعونه ,سبب خلاص أبدي" عبرانيين 5 :7,9


علشان مشي طريق طويل !.. وطلع جبل عالي !..


وشال الصليب .. قبل ما الصليب يشيله !..


يسوع لما قاللي : (بحبك حتي الموت !)نفذ !.. نفذ من غير ما يشوف هاديله إيه قصاد حبه لي !..


نفذ بالرغم من إني لسنين طويلة .. مش بس مابادلتوش حبه .. لأ ده أنا كمان ياما قلتله : "أبعد عني , وبمعرفة طرقك لا أسر" أيوب 21 :14...


زمان .. كنت باشتري صلبان كتير .. وبالبسها من باب الزينة ..


كذا صليب دهب أصفر .. لزوم التغيير !..


وصليب دهب أبيض .. لزوم الشياكة !.ز


والأمر ما يخلاش من صليب ألماظ .. لزوم العياقة !..


لكن دلوقتي .. كل ما بشوف صليب .. بأنحني قدام معناه .. مش قدام قيمته المادية !..


لأني فهمت إن صليب المسيح ..


هو برهان محبته لي !..


هو عقد المصالحة بيني وبين السما !..


هو وسيلة التحرير من عبودية الخطية !..


هو الكفارة (التغطية ) اللي بتحميني من غضب الديان .. الجالس علي العرش !..


وبقيت كل ما اشوف شخص لابس صليب باسأله في سري : يا تري إنت فاهم إيه معني الصليب الي إنت لابسه ؟؟..


يا تري إنت سامع صوت المصلوب وهو بيقول لك : "انت بتاعي مرتين !..مرة يوم ما خلقتك !.. ومرة يوم ما فديتك من يد إبليس !" ...


"كنيسة الله التي إقتناها (المسيح ) بدمه "أعمال الرسل 20 :28


زمان ..ك كنت فاكرة ان المعجزة هي إن ظروفي تتغير !..


لكن دلوقتي إكتشفت إن معجزة المعجزات هي إن أنا اللي أتغير !..


إن أنا اتولد من جديد !..


أهو ده العجب بعينه !..


ومباقاش يهمني مكسب أو خسارة !..اصلي كسبته هو !..


ومباقاش يهمني مين باعني !..


أصله إشتراني هو !..


ومش بس كده !..


لأ ..دي "أشياء أخري كثيرة صنعها يسوع (في حياتي ) إن كتبت واحدة واحدة , فلست أظن إن العالم نفسه يسع الكتب المكتوبه" يوحنا 21: 25...


وإنت .. يا تري حياتك فيها تغيير واضح للأفضل ..إنت حاسس بيه .. واللي حواليك شايفينه ولامسينه ؟ ..


ولا حياتك هي هي ..دلوقتي .. زي من عشر سنين .. زي من عشرين سنة ؟..


علي فكرة .. مش مهم يكون في تاريخ محدد في حياتك تكون إتقابلت فيه مع الرب يسوع ..لكن مهم جدا إن حياتك تكون مقسومة لـــ : زمان كنت , ودلوقتي بقيت !..


معقول يعني يا راجل يا طيب .. دخول يسوع في القلب زي عدمه ؟!..


معقول ها يسكن في قلبك .. ومايحتاجش يغير حاجه فيه ؟!..


ولا معقول ها يتولد جواك .. وماتبانش عليك نعمته ؟!..


لو إنت زي ما إنت .. يبقي إنت لسة ما قابلتش يسوع !..


أو مين عارف ؟!..يمكن تكون قابلته .. لكن مش عايز تفتحله باب قلبك !..


إوعي تكابر !.. الله ما بيرجع في كلامـه


ليه بتكابر ؟!.. وإنت مادقتش مرة سلامه


بيقولو: (إسأل مجرب ولا تسأل طبي !) ..


أنا جربت يكون عندي كل حاجة !..


لكن يسوع مش في المشهد !..


وجربت إن تتسحب مني حاجة ورا حاجة !..


لكن يسوع مالي المشهد !..


وطلعت بخلاصه :


من غير الرب .. نعيم السما ما يتحب !..


ومع أب حنون .. نار المشاكل بتهون !..


"أحلفكن يا بنات أورشليم إن وجدتن حبيبي أن تخبرنه بأني مريضة حبا"